2 drejtues të mjeteve ujore janë gjobitur këtë të martë nga policia, pasi kryenin manovra të rrezikshme me Jet Ski në plazhet e Ksamilit dhe Shëngjinit.
Pamjet filmike të manovrave të tyre u publikuan në rrjete sociale, gjë që solli ndërhyrjen e policisë.
2 prej mjeteve lundruese Jet Ski u bllokuan dhe drejtuesit e tyre u gjobitën me 110000 lekë për rastin e Ksamilit dhe 100000 lekë për atë të Shëngjinit.
Ata akuzohen për lundrim jashtë zonës së përcaktuar, ndërsa drejtuesit e mjetit ujor në Ksamil i është konstatuar mungesë dokumentacioni.
Aktualisht po vijon puna për gjetjen dhe bllokimin edhe të 2 mjeteve të tjera ujore, që shfaqen në pamje filmike, duke kryer manovra të rrezikshme.
Policia e Shtetit apelon për të gjithë përdoruesit e mjeteve ujore, që të pajisin mjetet me dokumentacionin e kërkuar me ligj, si dhe të lundrojnë brenda zonës së përcaktuar për këtë aktivitet.
Gjithashtu, Policia e Shtetit fton qytetarët dhe median që të denoncojnë në njësitë fizike të Policisë dhe në numrin pa pagesë 112, çdo paligjshmëri që ata hasin.
