Avokati Sokol Mëngjesi është dhunuar mëngjesin e kësaj të Mërkure në kryeqytetet.
Ngjarja ka ndodhur rreth orës 08:50, në zonën e ish-Bllokut. Sipas policisë, Mëngjesi është goditur nga persona të paidentifikuar dhe është dërguar në spitalin e Traumës për të marrë ndihmë mjekësore.
Gjendja e tij shëndetësore është e stabilizuar, ndërsa një hetim ka nisur për identifikimin dhe kapjen e autorëve, shtuan të njëjtat burime.
Ndërkaq, burime pranë bluve thanë se dyshohet që avokati është goditur me grushte e sende të forta në kokë e trup dhe tre persona dyshohet se kanë marrë pjesë në dhunimin e tij. Avokati është sulmuar teksa ishte duke ecur në rrugë i vetëm, pasi shoqëroi të birin në kopësht. Blutë kanë sekuestruar kamerat e sigurisë në zonë, që pritet të hedhin më shumë dritë mbi dinamikën e ngjarjes dhe zbulimin e autorëve. Gjithashtu, ka marrë në pyetje dëshmitarë.
Pas mjekimit, pritet të merret dhe dëshmia e avokatit. Dhunimi i avokatit për shkak të detyrës është nga pistat që po hetohet nga grupi hetimor, megjithatë po verifikohen edhe konfliktet e mundshme që mund të ketë avokati.
Mëngjesi është pjesë trupës pedagogjike të Fakultetit të Drejtësisë në Universitetin e Tiranës dhe si mbron interesat e ish-kryeministrit Sali Berisha në procesin gjyqësor që po zhvillohet në Gjykatën e Posaçme për çështjen “Partizani”.
PD: Urdhëruesi është Rama
Për Partinë Demokratike, është pikërisht detyra e Mëngjesit si përfaqësues ligjor i kryedemokratit Berisha, që ka sjellë sulmin ndaj tij. Sipas PD-së, urdhëruesi i dhunës ndaj avokatit është kryeministri Edi Rama.
“Ky është një akt kriminal dhe hakmarrje e verbër, primitive e Edi Ramës ndaj profesor Sokol Mëngjesit, sepse ai së bashku me kolegët e tij, faktuan para shqiptarëve me prova dhe dokumente zyrtare të pakundërshtueshme, se procesi gjyqësor kundër kryetarit të Partisë Demokratike është një proces kryekëput politik i bazuar ne një piramidë mashtrimi, siç është çështja e Klubit Sportiv Partizani”, tha pas ngjarjes zëdhënësja e PD-së Floriana Garo
