Gjigandi farmaceutik AstraZeneca ka pranuar se vaksina e saj e përdorur gjerësisht kundër Covid mund të shkaktojë efekte anësore të rralla si mpiksje gjaku dhe një numër të ulët të trombociteve në gjak.
Vaksina “Covishield” u zhvillua nga kompania britaniko-suedeze në bashkëpunim me Universitetin e Oksfordit, në Mbretërinë e Bashkuar, dhe u shpërnda gjerësisht në më shumë se 150 vende gjatë pandemisë. Asokohe, disa studime zbuluan se vaksina ishte 60% deri në 80% efektive në mbrojtjen kundër koronavirusit.
Megjithatë, studimet e reja kanë zbuluar që Covishield potencialisht mund të shkaktojë mpiksje gjaku tek disa njerëz dhe kjo mund të jetë edhe fatale.
Një padi kolektive e ngritur në Mbretërinë e Bashkuar pretendoi se vaksina çoi në vdekje dhe probleme serioze shëndetësore te marrësit e saj dhe kërkoi deri në 100 milion paund dëmshpërblim për rreth 50 viktima. Një nga ankuesit tha se vaksina i shkaktoi dëmtim të përhershëm të trurit pasi ai zhvilloi një mpiksje gjaku e cila e pengonte të punonte.
Ndërsa AstraZeneca i kundërshtoi këto pretendime, ajo pranoi për herë të parë në një nga dokumentet e gjykatës se vaksina “në raste shumë të rralla mund të shkaktojë TTS”, ose sindromën e trombocitopenisë, e karakterizuar nga mpiksje gjaku dhe numër të ulët të trombociteve.
Organizata Botërore e Shëndetësisë ka konfirmuar se Covishield mund të ketë efekte anësore potencialisht kërcënuese për jetën.
“Një ngjarje negative shumë e rrallë e quajtur Sindroma e Trombozës së Trombocitopenisë, e cila përfshin ngjarje të pazakonta dhe serioze të koagulimit të gjakut të shoqëruara me numër të ulët të trombociteve, është raportuar pas vaksinimit me këtë vaksinë.”
