Pas Parkut Kombëtar të Butrintit dhe burgut të Spaçit, një fondacion privat synon të menaxhojë edhe Parkun Arkeologjik të Bylisit.
Në planin e propozuar nga Ministria e Ekonomisë, Kulturës dhe Inovacionit thuhet se:
“Në kontekstin e nevojës për një menaxhim efikas të pasurisë kulturore të Bylisit dhe rrënojave në Klos, propozohet një qasje e re. Një fondacion i ngritur nga institucione të specializuara sugjerohet si një zgjidhje e përshtatshme për këtë fazë. Ky model synon të inkorporojë jo vetëm kontributet nga donatorët por edhe bashkëpunimin me sektorin privat. Ministria e Ekonomisë, Kulturës dhe Inovacionit do të vijojë të mbajë përgjegjësinë kryesore për mbrojtjen e trashëgimisë kulturore, ndërsa fondacioni i propozuar do të merret me menaxhimin e përditshëm, organizimin e aktiviteteve të ndryshme me karakter eduekues, evente, dhe promovime.”
Sipas ministrisë, misioni i këtij fondacioni përfshin: Objektiva zhvillimore si promovimi kulturor dhe edukues i trashëgimisë, organizimi i shërbimeve turistike dhe zhvillimi i turizmit, si dhe gjenerimin e të ardhurave për të mbuluar shpenzimet operative dhe ato të jashtëzakonshme.
Në bazë të planit të propozuar nga ministria, “Bordi i Fondacionit të ri do të emërojë një Drejtor të Përgjithshëm të përgjegjshëm për menaxhimin e të gjitha operacioneve të sitit, përmes një plani menaxhues dhe një strategjie pesë ose shtatëvjeçare investimi, e cila do të përditësohet vjet dhe do të miratohet nga MEKI. Fondacioni i ri do të ketë autoritet në të gjitha sferat e funksionimit që lidhen me mirëmbajtjen, mbrojtjen dhe promovimin e trashëgimisë kulturore, përfshirë menaxhimin e vizitorëve, organizimin e ngjarjeve, menaxhimin e shërbimeve turistike, zhvillimin e kapaciteteve të brendshme, dhe angazhimin me komunitetin lokal etj..”
Ministria e Ekonomisë, Kulturës dhe Inovacionit bën të qartë faktin se ajo do vijojë të mbetet autoriteti kryesor në mbrojtjen dhe mbikëqyrjen e trashëgimisë, me një institucion të specializuar të angazhuar në zhvillimin dhe menaxhimin e resurseve njerëzore dhe organizative.
Ditën e djeshme është mbajtur në Bylis një dëgjesë publike për planin e menaxhimit të integruar të parkut arkeologjik të Bylisit. Të pranishëm në prezantim ishin edhe përfaqësues të Ministrisë së Ekonomisë, Kulturës dhe Inovacionit, arkeologë, përfaqësues nga bashkia Mallakastër, IKTK-ja, etj.
