Detaje të reja kanë dalë në dritë nga vrasja e 18-vjeçarit Aurelio Dervishi, mbrëmjen e djeshme në Tiranë. Ngjarja e rëndë ndodhi në zonën e Shkozës në kryeqytet, pas një sherri mes dy grupeve të të rinjve, që pasoi me marrjen e jetës së 18-vjeçarit. Dervishi u qëllua dy herë me thikë, ndërsa ndërroi jetën në vendngjarje si pasojë e plagëve të marra. Në ngjarje dyshohet se kanë qenë të përfshirë 5 persona.
Burime bëjnë me dije se Dervishi dhe autorët janë konfliktuar disa ditë më parë mes tyre, dhe mbrëmjen e djeshme i kanë bërë pritë makinës me të cilën udhëtonte viktima. Nga të dhënat paraprake, mësohet se autorët e vrasjes i kanë bërë shenjë makinës ku lëvizte viktima, Aurelio Dervishi, si pasagjer që të ndalonte, por shoferi nuk është bindur. Më pas ata kanë zbritur nga mjetet dhe janë përplasur fizikisht, duke qëlluar dy herë me thikë në gjoks 18-vjeçarin.
Më pas të rinjtë dyshohet se janë larguar në drejtim të Unazës Lindore me një mjet tip ‘Tiguan’, ndërkohë që ende nuk janë vënë në prangat e policisë, pavarësisht ngritjes së postoblloqeve. Grupi hetimor ka marrë në pyetje dhe shoferin e automjetit tip ‘Audi’ me te cilin po udhëtonte viktima, ndërsa ai ka pohuar se nuk i njihte autorët.
Sipas tij, personat që ndodheshin në makinën tjetër i kanë thënë ‘pse na shikoni’. Policia vijon hetimet për zbardhjen e ngjarjes së rëndë dhe arrestimin e autorëve.
