Këtë të mërkurë ka nisur seanca për mandatin e Ministres së Jashtme Olta Xhaçka në Gjykatën Kushtetuese. Në seancën e sotme do të shqyrtohet kërkesa e 14 deputetëve të Partisë Demokratike.
Sipas kërkesës, Xhaçka, aktualisht ministre për Europën dhe Punët e Jashtme në qeverinë “Rama” ka përfituar drejtpërdrejt të mira publike nëpërmjet vendimeve të Komitetit të Investimeve Strategjike në favor të kompanive në zotërim të bashkëshortit të saj, ish-deputetit socialist, Artan Gaçi dhe familjarëve të tjerë të ministres.
Kërkesa është firmosur nga 14 deputetë të kësaj partie dhe i referohet neneve kushtetuese që ndalojnë deputetin që të përfitojë të mira publike.
“Dhënia e pasurisë publike për qëllime fitimi dhe ushtrimi të veprimtarive fitimprurëse është bërë në shkelje flagrante të ndalimeve kushtetuese dhe ligjore, që ndalojnë deputetin dhe për efekt të ligjit bashkëshortin e tij, të përfitojë pasuri të shtetit apo të kryejë veprimtari fitimprurëse që burojnë nga pasuritë e shtetit. Ky fakt përbën shkelje të rëndë të ligjit, që passjell mbarimin/pavlefshmërinë e mandatit të deputetit, sipas neneve 70/2-3 dhe 71/2/c të Kushtetutës,” thuhet në kërkesën e PD.
Deputetët e PD-së arsyetojnë se bazuar në ligjin nr. 9367/2005 për konfliktin e interesit provohet se deputetja Xhaçka ka kryer veprimtari fitimprurëse që burojnë nga pasuria e shtetit.
