Gabriel Attal bëhet kryeministri më i ri në moshë i Francës, teksa presidenti Emanuel Macron po përpiqet t’i japë një frymë të re mandatit të tij të dytë në prag të zgjedhjeve parlamentare evropiane.
34-vjeçari Attal ka shërbyer deri më tani si ministër i Arsimit. Lëvizja, jo domosdoshmërish do të çojë në ndonjë ndryshim të madh politik, por ajo sinjalizon dëshirën e Macron për tu zhvendosur përtej reformave jopopullore në pensione dhe emigracion dhe për të përmirësuar mundësitë e partisë së tij të qendrës në zgjedhjet europiane të qershorit.
Sondazhet sugjerojnë se kampi i Macron qëndron pas atij të lideres të së djathtës ekstreme, Marine Le Pen, me 10 pikë përqindje. Përveçse kryeministri më i ri në historinë franceze, Attal do të bëhet edhe i pari homoseksual i deklaruar që do të drejtojë ekzekutivin. Mosha e tij dhe e Macron e marrë së bashku, është me e ulët se ajo e Joe Biden që rikandidon për një mandat të dytë për Shtëpinë e Bardhë.
Në vitet e para të presidencës së Emmanuel Macron, Attal ishte pjesë e një grupi të rinjsh të mirë-arsimuar të zgjedhur për të këshilluar dhe mbështetur liderin po aq të ri francez.
U dallua nga grupi për shkak të gatishmërisë së tij për të folur në publik për çdo çështje për të cilat i kërkohej dhe talentit për ta shtjelluar. Aftësitë e frikshme të komunikimit dhe reputacion për të qenë në gjendje të diskutojë çështje me përfaqësues nga kampet e tjera politike duke iu përgjigjur direkt pyetjeve në parlament dhe në publik, i kanë dhënë atij pseudonimin “Snajperisti i fjalës”. Madje natyra dinamike e Attalit dhe karriera e tij u kujtojnë vëzhguesve presidentin.
Attal është djali i Yves Attal, një avokat dhe producent filmash me origjinë hebreo tuniziane, i cili vdiq në vitin 2015, dhe Marie de Couriss, e cila rrjedh nga të krishterët ortodoksë nga Odesa.U rrit në Paris me tre motrat e tij më të vogla dhe përdor emrin e plotë Gabriel Attal de Couriss.
