Situata e tensionuar ditët e fundit në veri të Kosovës ka bërë që zyrtarë të BE si dhe të SHBA të reagojnë për të ulur tensionet mes Kosovës dhe Serbisë.
Për këtë situatë ka reaguar dhe Shtëpia e Bardhë, përmes një deklarate zyrtare për mediat. Zëdhënësi i Shtëpisë së Bardhë Jon Finer i ka bërë sërish thirrje kryeministrave Albin Kurti dhe Aleksandar Vuçiç që të ulin tensionet dhe të zbatojnë marrëveshjen e normalizimit të arritur në Bruksel dhe Ohër në fillim të këtij viti.
“Ai kërkoi nga Qeveria e Kosovës që t’u mundësojë kryetarëve të sapozgjedhur të komunave që t’i kryejnë detyrat e tyre nga vend-ndodhje alternative dhe të tërheqë forcat policore nga ndërtesat komunale. Ai gjithashtu përshëndeti gatishmërinë e kryeministrit Kurti për të punuar për krijimin e kushteve për zgjedhje të reja”, thuhet në njoftimin e Shtëpisë së Bardhë për bisedën me kryeministrin e Kosovës.
Zoti Finer gjithashtu i bëri thirrje presidentit serb për marrjen e masave për qetësimin e gjendjes.
“Po ashtu Finer i kërkoi Qeverisë së Serbisë që të tërheqë forcat e saj të armatosura të stacionuara afër kufirit dhe të ulë gjendjen e gatishmërisë, si dhe t’u bëjë thirrje protestuesve që të ruajnë qetësinë në veri të Kosovës”.
