Shuhet në moshën 83-vjeçare diva e muzikës Rock ‘n’ Roll, Tina Turner.
Prej kohësh vuante nga një sëmundje e cila i mori jetën. Lajmin e bënë të ditur mediat e huaja.
83-vjeçarja Mbretëresha e Rock ‘n Roll vdiq paqësisht këtë të mërkurë në mbrëmje. Ajo u shua në shtëpinë e saj, në Kusnacht pranë Zyrihut, në Zvicër. Me ikjen e saj, bota humb një legjendë të muzikës dhe një shembull model”, tha në një deklaratë një zëdhënës i këngëtares.
E lindur në SHBA Diva në 26 nëntor 1939, Tina Turner ishte një prej këngëtareve rock më të dashura në botë, e famshme për performancat e saj në skenë dhe një mori hitesh. Ajo u bë fillimisht e famshme në vitet 1960 krah ish-bashkëshortit Ike Turner, me këngët klasike, River Deep, Mountain High, në mesin e repertorit të tyre.
Emri i saj i vërtetë ishte Anna Mae Bullock dhe Tina Turner iu dha nga bashkëshorti Ike, kur talenti i saj u bë i dukshëm. Emrin ia vendosi me qëllimin që në rast se ajo do ta linte, ta zëvendësonte në grupin muzikor që kishin bashkë. Shumë shpejt ai u bë abuziv me të. Kur Turner u përpoq të linte grupin ai e dhunoi.
Jeta e saj u përball me plot sfida por ajo nuk u dorëzua kurrë. “Marrëdhënia ime me Ike kishte marrë fund ditën kur zbuloi se do isha burimi i tij i të ardhurave”, shkruante Turner në biografinë e saj të publikuar në 2018-n “My Love Story” (Historia ime e dashurisë). “Ai donte të më kontrollonte, si ekonomikisht, ashtu edhe psikologjikisht, në mënyrë që të mos e lija kurrë”,- shprehej asokohe Tina.
Hiti i parë i saj ishte nën emrin Ike dhe Tina Turner, “A Fool in Love”, në Korrik të 1960-s. Kënga theu Top 30-shen amerikane dhe kështu nisi suksesi për legjendën. Por ishte perfomanca e tyre live që i bënte aq të suksesshëm. Në vitet 1970 ata dominonin klasifikimet dhe ishin një forcë fituese në Grammy. Rruga e tyre bashkë përfundoi kur Turner arriti ta linte Ike në 1976-n. Ai kishte qenë gjatë gjithë kohës i dhunshëm dhe e kishte tradhtuar.
Në divorcin që u finalizua në 1978-n, Turner mori vetëm 2 makina dhe të drejtat për të mbajtur emrin e saj skenik. “Ike luftoi pak sepse e dinte se çfarë mund të bëja unë me të”, shprehej Turner në një dokumentar.
E në fakt ashtu rezultoi! Në vitet 1980, ajo u shndërrua në ikonë, me albumin e saj “Private Dancer”. Turner afirmoi dhe amplifikoi rolin e grave me ngjyre në Rock n’ Roll. Jeta e saj u pasqyrua së fundmi në një dokumentar të publikuar në 2021-n me titull Tina.
