Lewis Hamilton po feston 10 vjet me ekipin e Mercedes këtë sezon dhe po shikon pas në disa nga momentet e tij të preferuara nga koha e tij si bashkëpunimi me Valtteri Bottas dhe inxhinierin e garave për një kohë të gjatë Peter Bonnington.
Hamilton dhe Bottas ishin shokë një skuadre te Mercedes për pesë sezone – nga 2017 deri në 2021 – duke fituar pesë tituj gjatë asaj kohe, pasi finlandezi iu bashkua ekipit nga Williams, pasdaljes në pension të pilotit Nico Rosberg.
Teksa ka reflektuar për momentet e veçanta që ka kaluar me ekipin, Hamilton tregoi pikërisht atë që e bëri Bottas një shok kaq të mirë ekipi, pavarësisht “rivalitetit të tyre të brendshëm”.
“Valtteri është një shok dhe koleg i mrekullueshëm i skuadrës, dhe kur flas për shokun e skuadrës, mendoj se ka një konflikt interesi këtu në sportin tonë,” tha shtatë herë kampion bote, Hamilton.
“Ne kemi dy kampionate. Një kampionat ekipor, për të cilin garojmë të gjithë sëbashku, dhe një kampionat pilotësh. Pra, detyra jonë është të shënojmë më shumë pikë individualisht ose kolektivisht për ekipin, por në fund të fundit duhet të mundni shokun tuaj të skuadrës, kështu që gjithmonë ekziston ky rivalitet i brendshëm.
“Ekziston gjithmonë kjo rrugë delikate për të ecur, dhe është shumë e lehtë të jesh në anën e gabuar dhe të humbasësh miqtë. Unë dhe Valtteri nuk kemi rënë kurrë pre e presionit të lojës dhe rivalitetit. Ne gjithmonë kemi folur vetëm për gjëra të mira. Ai më ka përkrahur në çdo sfidë, sikurse dhe unë atë.
Hamilton shtoi: “Dhe ne punuam së bashku për të provuar ta shtyjmë ekipin përpara së bashku. Kemi kaluar vite të mrekullueshme së bashku ku ai më ka mbështetur dhe unë e kam mbështetur atë.
“Dhe ne ende mbështesim njëri-tjetrin sot, dhe udhëtojmë së bashku në gara, mjaft shpesh.
Një tjetër marrëdhënie në Mercedes për të cilën Hamilton flet me dashuri është ajo që ndan aktualisht me inxhinierin e tij të garave Bonnington. ‘Bono’ ka qenë zëri në radion e Hamiltonit gjatë pjesës më të madhe të qëndrimit të tij me Mercedes – ndërsa inxhinieri i performancës së Hamilton, Marcus Dudley, u fut disa herë në 2019 dhe 2022.
“Unë kur arrita në skuadër, gjeta përkrahje të jashtëzakonshme nga Bono. Unë mendoj se njerëzit ndoshta e nënvlerësojnë faktin se sa kohë duhet për të ndërtuar një marrëdhënie, një miqësi, për të kuptuar me të vërtetë njëri-tjetrin dhe se si punoni të dy”, tha Hamilton.
“Sidomos atë vit të parë, unë luftova shumë fort. Bono më dha shtysën që unë të luftoja fort dhe ja arritëm një fitore.”
