Të premten në një mbledhje jashtë radhe të këshillit të ministrave merret vendimi për rritjen e të gjitha pagave dhe pensioneve si pjesë të reformës së lajmëruar nga kryeministri Rama.
Kryeministri Rama gjatë vizitës së tij në Maternitetin “Mbretëresha Geraldinë” në një bashkëbisedim me bluzët e bardha komunikoi për rritjen e pagave.
Pas rritjes të pagës së mjekëve specialistë me 50 mijë lek të reja në muaj prej 1 Prillit, tashmë ndryshim page edhe mjekëve të përgjithshëm.
“Do të rritet me 59 mijë lek dhe do të shkojë 111 mijë e 672, këto bishtat mos iu merrni shumë fiks sepse mund të ndryshojnë, por sigurisht fakti që paga e mjekëve të përgjithshëm do të shkojë te 111 mijë lekëshi, nuk do të ndryshojë.”- u shpreh kryeministri Rama.
Gjithashtu edhe rritje page për infermierët.
“Do të shkojë te 72 mijë e 118 lek, por ky është hapi i parë sepse në harkun midis dy prilleve po themi, tani dhe prillin tjetër, do ta plotësojmë kuadrin. Mjekët specialistë do të vazhdojnë dhe për momentin nuk do kërkojnë më shumë shpresoj sepse specialistët në QSUT për shembull do ta kenë pagën 174 mijë lek, por mjekët e përgjithshëm do të shkojnë në 131 mijë e 672 lek dhe infermieret do të shkojnë 87 mijë e 118 lek.”- tha Rama.
Përfundimisht, kryeministri theksoj se “ambicia” e qeverisë është që paga mesatare të jetë 900 euro.
