Komisioni Qendror i Zgjedhjeve ka testuar mesditën e sotme sistemin e votimit dhe numërimit elektronik
Kreu i KQZ Ilirjan Celibashi tha se votimi dhe numërimi elektronik garantojnë 100% fshehtësinë e votës dhe se nuk ka asnjë lloj mekanizmi që dikush të verifikojë votën e dhënë nga një zgjedhës për një subjekt të caktuar.
Celibashi gjithashtu shtoi se kushdo që thotë të kundërtën, po bën spekulime politike.
“Nga pikëpamja formale jemi duke përmbushur një detyrim të Kodit Zgjedhor, sot kemi radhën e pajisjeve të votimit dhe numërimit elektronik nesër do të bëhet testimi i pajisjeve të identifikimit elektronik.
Garancia e plotë që ofrojnë këto pajisje në lidhje me fshehtësinë e votës.
Nuk ka asnjë lloj mundësi mënyrë apo mekanizëm që dikush të verifikojë votën e dhënë nga një zgjedhës për një subjekt të caktuar. Kemi pasur jo në mënyrë fare zyrtare, por disa shqetësime të tilla që janë përcjellë në komisionin e Zgjedhjeve në lidhje me fshehtësinë e votës, jam këtu për të konfirmuar se garancia është e plotë 100%.
Kushdo që thotë të kundërtën është një spekulant politik. S’ka asnjë lloj mundësie as kompania as KQZ askush nuk ka mundësi që të verifikojë se për kë është votuar në mënyrë kategorike.
Ne synojmë që brenda 30 minutave nga momenti që mbyllet procesi i votimit të kemi shpalljen rezultateve paraprake për Vorën, Kamzën dhe Elbasanin. Është një projekt pilot, por nga ajo që vlerësojmë besoj se të gjitha procedurat do të kërkojnë një kohë që nga momenti kur mbyllet procesi i votimit” tha Celibashi.
Votimi dhe numërimi elektronik do të kryhet për bashkinë Elbasan, Kamëz dhe Vorë.
