Gjigandi amerikan i automjeteve elektrike, Tesla, do të ndërtojë një fabrikë të re të madhe në qytetin verior meksikan të Monterrey, ka thënë të martën presidenti meksikan, Andres Manuel Lopez Obrador, raportoi Reuters.
Ndërtimi i kësaj fabrike do t’i japë një shtysë Meksikës, e cila po kërkon të përfitojë nga tensionet gjeopolitike duke tërhequr investime dhe duke ndikuar pozitën dominuese të Azisë në industritë e prodhimit.
Obrador ka thënë se të dy palët kanë arritur marrëveshje pas një telefonate me shefin ekzekutiv të Teslas, Elon Musk, të hënën, pas një bisede që zhvilluan në fund të javës së kaluar.
“Ky do të përfaqësojë një investim të konsiderueshëm dhe shumë e shumë vende pune”, tha Lopez Obrador para gazetarëve, duke u shprehur se Musku ka qenë i hapur ndaj shqetësimeve të Meksikës dhe ka pranuar propozimet e saj.
Lopez Obrador tha se Tesla ka të ngjarë të japë më shumë detaje të planeve të saj të mërkurën.
