Në mesditën e sotme pritet të zhvillohet gjyqi për kandiatin e koalicionit ‘Bashkë Fitojmë’ Fredi Beleri, i cili u arrestua për “blerje votash.
Prokuroria e Vlorës pritet që të kërkojë “Arrest me burg”, për kandidatin për bashkinë e Himarës si dhe bashkëpunëtorin e tij Pano Kokaveshi. Ndaj tyre gjithashtu prokuroria ka ngritur akuzën për veprën penale të “Korrupsionit aktiv në zgjedhje” kryer në bashkëpunim.
Fredi Beleri u arrestua mesnatën e së enjtes e për këtë arrestim, kryeministri grek Kyriakos Mitsotakis tha se “nuk do të pranojë”.
“Nëse Shqipëria dëshiron t’i afrohet BE-së, ka detyrimin të sigurojë zgjedhje të lira dhe të ndershme bashkiake”, ka qenë mesazhi i kryeministrit grek.
Gjithashtu, ministri i Jashtëm, Nikos Dendias, krahas udhëzimeve që i dha qeverisë së Shqipërisë për progres, theksoi se “arrestimi i një kandidati për kryetar bashkie dy ditë para zgjedhjeve nëse nuk ka prova të forta, përbën një skandal”
Kandidati i koalicionit ‘Bashkë Fitojmë’, Fredi Beleri u arrestua për akuzën e shit-blerjes së votës për zgjedhjet e së dielës.
Ditët e fundit Beleri ka qenë në qendër të akuzave të kryeministrit Edi Rama për deklaratën e bërë në mediat greke për helenizimin e Himarës.
Ai u ndalua para lokalit të tij bashkë me 3 persona të tjerë, avokati, dhe përfaqësues të shtabit elektoral.
Beleri u akuzua për veprat penale: “korrupsionit aktiv për zgjedhje kryer në bashkëpunim”.
Beleri ka deklaruar se nuk është i përfshirë në shit-blerje të votës, por pavarësisht kësaj, është lënë në burg. Nga ana tjetër, Greqia bën thirrje për lirimin e tij. Ministri i Jashtëm Grek, Nikos Dendias kërkon lirimin e Belerit, nëse s’ka prova.
