Një nga gjashtë punëtorët e plagosur të premten mbrëma nga shpërthimi që ndodhi në fabrikën ‘Aluminium’ në Bolzano, Itali ka ndërruar jetë.
Diallo Bocar, 31 vjeç, nuk mundi t’i mbijetonte djegieve ndërsa kolegët e tij, dy prej tyre shqiptarë, vijojnë të jenë në spital në gjendje të rëndë.
Punëtori u shtrua në repartin e djegieve të spitalit ‘Borgo Trento’ në Verona bashkë me 33-vjeçarin shqiptar Sokol Hyseni i cili ndodhet në gjendje kritike për jetën.
Artan Vila, 48 vjeç, shqiptari i konsideruar si punonjësi “kyç” i kompanisë dhe i pari që u godit nga flakët, ndodhet i shtruar në spitalin ‘Niguarda’ në Milano me djegie në fytyrë dhe në pjesën tjetër të trupit, ndërsa senegalezja Djette Buba’ Aboubacar, 25 vjeç, ndodhet në qendrën e djegies në Murnau në Bavari. Në spitalin “San Maurizio” janë shtruar me djegie në pjesë të ndryshme të trupit edhe dy punëtorë të tjerë të kompanisë.
Lidhur me shkaqet e shpërthimit konsiderohen dy hipoteza: një defekt në sistemin e ftohjes për – kontaktin e ujit me metalin e shkrirë ose një gabim njerëzor që do të kishte shkaktuar kontakt midis ujit dhe aluminit. Në orët pas tragjedisë, Prokuroria e Bolzanos hapi një hetim.
