Edhe pse qeveria shqiptare thotë se ekonomia është në rritje madje edhe më mirë se vendet e rajonit, të dhënat nga ndërkombëtarët tregojnë të kundërtën.
Sipas Fondit Monetar Ndërkombëtar (FMN) varfëria në Shqipëri është rritur vitet e fundit, pasi në vitin 2022 arriti në 25.2% nga 22% që kishte qenë në 2021, me një rritje prej 3.2 pikë përqindje brenda një viti.
FMN thotë që perspektiva e anëtarësimit në BE mund të ofrojë një shtysë për të adresuar sfidat strukturore të gjata, një prej të cilave është dhe varfëria.
“Shkalla e varfërisë është e dukshme në krahasim me homologët e rajonit dhe depërtimi i kredisë është i ulët. Shqipëria ka pasur gjithashtu flukse të mëdha emigracioni, pasi fuqia e saj e punës është joshur nga të ardhurat më të larta në vendet e BE-së. Korrupsioni dhe mangësitë në sundimin e ligjit mbeten shqetësime strukturore të kahershme”, thuhet në raport.
FMN vëren se ndryshe nga shumë vende të tjera, në Shqipëri norma e varfërisë është më e ulët tek të moshuarit, në krahasim me pjesën tjetër të popullsisë. Por FMN paralajmëron se varfëria tek të moshuarit mund të rritet, për shkak se njerëzit tani po punojnë të siguruar për periudha më të shkurtra kohore.
“Ka të ngjarë, që në të ardhmen, më shumë njerëz do të marrin pensione të pjesshme, pensione sociale ose të mbeten pa pension, për shkak të kohëzgjatjes së pamjaftueshme të kontributit. Shkalla e zëvendësimit mund të ulet dhe kjo rrit shqetësimet për kërcënimin e varfërisë tek të moshuarit. Ndërsa në vitin 2012, personat që dolën në pension kishin kontribuar mesatarisht për 35 vjet, ata që dolën në pension në vitin 2022 kontribuuan mesatarisht për 27 vjet”, raporton FMN
Sipas të dhënave nga FMN, Shqipëria dhe Kosova janë ndër vendet e fundit në Europë për treguesin e të ardhurave për frymë të matur sipas barazisë së fuqisë blerëse, të matur në dollarë ndërkombëtarë. Në vitin 2023, ky tregues për Shqipërinë ishte 19.5 mijë dollarë ndërkombëtare (treguesi eliminon diferencat në çmime midis shteteve). Shqipëria lë pas Kosovën, që e ka këtë tregues 15.8 mijë dollarë.
