Protesta e ditës së sotme e Opozitës para Parlamentit ka angazhuar Policinë e Shtetit me marrjen e masave, 700 efektivë janë në gatishmërisë për rendin dhe qetësinë e protestës e cila nis në orën 10:00.
Godina institucionale do të rrethohet nga uniformat blu duke shtuar masat e sigurisë.
Në vijën e parë do të qëndrojnë forcat e rendit dhe të njësisë “Shqiponja”, ndërsa ato të Ndërhyrjes së Shpejtë dhe RENEA do të jenë të dislokuara në pjesën e anësore të parlamentit. Ndërsa efektivë të Gardës janë dislokuar në pjesën anësore nga krahu i “Pedonales” nga pritet të bëhet edhe hyrja e deputetëve.
Policia ka nisur bllokimin e rrugëve, kufizim të qarkullimit në rrugën “Xhorxh Bush” dhe pjesërisht në bulevardin “Zhan Dark” dhe kryqëzimi i rrugës së Elbasanit.
