Mes tensioneve dhe debateve u zhvillua këtë të hënë mbledhja e Këshillit Bashkiak në Bashkinë e Tiranës.
Përplasjet filluan pasi këshilltari i Partisë së Lirisë, Tedi Blushi, ndërpreu disa herë fjalën e kryebashkiakut Erion Veliaj dhe e qëlloi këtë të fundit me letra. Pas këtyre episodeve një tjetër akoma dhe më i dhunshëm u regjistrua në mbledhje, kësaj here me këshilltarin socialist, Halit Valterin.
Në foton më poshtë shihni momentin kur Tedi Blushi është çuar në këmbë dhe ka goditur me grusht Halit Valterin, i cili në mbrojtje të Veliajt u përfshi në debatin mes sekretarit të përgjithshëm të Partisë së Lirisë dhe kryebashkiakut të Tiranës.
![](https://tiranapress.al/wp-content/uploads/2024/07/foto-kryesor-1024x576.jpg)
Në këto foto të bërë publike shihet momenti kur dy këshilltarët janë konfliktuar fizikisht me njëri-tjetrin.
Ende nuk dihet saktësisht si ka ndodhur incidenti, por në foto shihet që Valteri i ka vënë duart në fyt, Blushit dhe ky i fundit e ka qëlluar.
Halit Valteri bëri një kallëzim në polici ndaj Tedi Blushit duke pretenduar se e ka qëlluar me grusht dhe sende të forta.
Blushi qëndroi për 5 orë në polici, ku pas daljes në një prononcim për mediat tha se u provokua.
“Prej 5 orësh janë në komisariatin e narko policisë për të dhënë sqarime për atë ngjarje të shëmtuar, për atë provokim që mu bë sot në mbledhjen e Këshillit Bashkiak, ku rrugaçëria dhe dhuna e narkoshteti mori përgjigjen e merituar, siç e mori në dyert e këtij komisariati sic do të marrë në çdo strofull të krimit. Me këtë regjim ka zero tolerancë, me këtë regjim ka vetëm qëndresë. Përgjigjja do të jetë shembullore në cdo formë, komisariati, policie, qeverie, bashkie. Kush provokon opozitën do marrë përgjigjen që meriton në mënyrë demokratike dhe shqiptare”, tha Blushi.