Deputeti i Partisë Demokratike, Bledion Nallbati, në fjalën e tij në Kuvend ka sjellë shqetësimet e fermerëve, të cilët para disa ditësh dolën në protestë për të kërkuar mbështetje të qeverisë ndaj tyre.
Nallbati ka ironizuar qeverinë, duke folur si të ishte pjesë e mazhorancës, teksa i “drejtohej fermerëve” me fjalën ‘turp’.
Ironizimi për qeverinë ka ardhur për shkak të gjobës së vënë ndaj fermerëve që dolën në protestë, e cila arrinte deri në vlerën 1 milionë lekë.
Bledion Nallbati:
Kam për të thënë disa fjalë atyre fermerëve që dolën në protestë, në emër të qeverisë: Po si nuk keni turp ju fermerë që dilni e protestoni në rrugë? Flisni e thërrisni, shqetësoni qeverinë, e i prishni gjakun? A nuk e dini ju, që janë kohë pushimesh? Një avaz ju, prodhimet, prodhimet…
Qeveria ju tha mbillni hashash, ju qepë. Qeveria ndërtoi laboratorë moderne droge, ju prap patate. Qeveria ndërton kulla, ju kasolle.
Turp të keni. Na e nxite faqen e na prishët imazhin e vendit. Pse me qepë e patate do zhvillojmë ekonominë e vendit ne?
Në Evropë shkohet me makijazh e botoks, jo me djersë e me baltë.
Prandaj thirrini mendjes fermerë, e hiqni dorë. Hiqni dorë nga këto budallalëqe, se ka 12 vjet qeveria, që ju thotë nuk ka para për bujqësinë. Për bujqëinë nuk na plas!
Prandaj tërhiquni nga kërkesat tuaj. Kjo qeveri ka 12 vite që ju thotë ne nuk kemi kohë për bujqësinë, ju prap prodhimet, bujqësia.
Po kush ju ka thënë ju, të mbillni qepë, patate, domate, mollë. Pse i mbaruan Serbisë këto, Rusisë, që t’i mbillni ju?
