Bashkimi i Partisë Demokratike është një temë që ka ngritur debat sëfundmi në vendin tonë.
Pikërisht për këtë çështje kreu i Lëvizjes për Zhvillim Kombëtar, Dashamir Shehi deklaroi ditën e sotme se bashkimi i Partisë Demokratike nuk është i mundur nëse deputetët do të ndjekin individë si Sali Berisha e Lulzim Basha.
Kreu i LZHK-së shprehu bindjen se riorganizimi se mund të bëhet realitet deri në vjeshtë, nëse do të ketë dakordësi mes deputetëve rreth disa politikave të caktuara dhe jo rreth personave fizikë.
Kreu i Lëvizjes për Zhvillim Kombëtar, Dashamir Shehi deklaroi sot se bashkimi i opozitës konkretisht i Partisë Demokratike, nuk është i mundur nëse deputetët do të ndjekin individë të caktuar si Sali Berisha apo Lulzim Basha.
“Unë gjykoj se nuk është shumë larg nëse do ketë urtësi nga shumica e atyre deputetëve që janë brenda. Jam i bindur se ndoshta nga vjeshta opozita mund të organizohet në atë lloj mënyre për t’i dhënë shpresë qytetarëve. Njerëzit opozitarë janë aty, me rreth 600 mijë vota që ishin kundër qeverisë në këto zgjedhje”,- tha Shehi.
Shehi shtoi më tej, se të dy si Basha ashtu edhe Berisha, janë tashmë njerëz të sprovuar disa herë dhe se rezultati tashmë dihet.
Por sipas tij, bashkimi brenda opozitës mund të vijë nga organizimi i aksioneve të përbashkëta politike, që më pas do të çojnë edhe në bashkimin numerik në Kuvend.
“Bashkimi nuk bëhet më pas njerëzve, aq më tepër pas këtyre njerëzve. Bashkimi bëhet ndaj një teze apo programi politik. Unë i propozoj kolegëve të tjerë të puqemi për të qarë disa ide të mëdha politike. Individët që përmendët ju fatkeqësisht janë provuar shumë herë. Është lodhje e madhe për Shqipërinë të merremi se kush është gjeli më i rëndësishëm opozitar. I ftoj që përmes aksioneve politike të bëhet edhe bashkimi numerik brenda opozitës”,-shtoi kreu i LZHK.
