Pas disa orësh kërkime është gjetur trupi i pajetë i 21-vjeçarit Fabjol Ibraliu, i cili pësoi aksident mbrëmjen e djeshme në aksin rrugor Lushnje-Rrogozhinë. Trupi është gjetur disa metra larg makinës brenda bimësisë së dendur, ndërsa mjeti përfundoi në oborrin e një prej banesave të zonës. Policia dhe zjarrfikësit kërkuan për disa orë për trupin e të riut, dhe fillimisht kishte shpresë se ai mund të ishte ndihmuar nga ndonjë kalimtar i zonës pas aksidentit. Por fatkeqësisht, ndjesia e nënës së tij, që vuri kujën pas aksidentit, është provuar, dhe i riu është gjetur i pajetë.
Ibraliu po drejtonte një “Ford”, i cili ka kaluar barrierat anësore dhe është futur brenda oborrit të një banese. Referuar informacioneve paraprake, dyshohet se shpejtësia tej normave të lejuara ka qenë shkaku i aksidentit. Nga sa shihet, 21-vjeçari ka qenë duke udhëtuar me 160-km në orë në momentin fatal të aksidentit.
Që prej mbrëmjes së djeshme, forcat policore dhe familjarët kanë zhvilluar kërkime për trupin e 21-vjeçarit, zhdukja e së cilit ishte mister deri para pak minutash. Mësohet se drejtuesi i mjetit ka dërguar babin në punë dhe më pas është nisur drejt punës së tij. Ky aks rrugor, mbetet një njollë e zezë për aksidentet, ndërsa banorët e zonës, shprehen se nuk kalon më shumë se një javë pa ndodhur një përplasje. Errësira në zonë, bën shpesh që shoferët të humbasin kontrollin e mjeteve, dhe të përfshihen në aksidente me pasoja të rënda.
