Një ngjarje e rëndë ka ndodhur në pitalin Rajonal të Beratit, ku një infermier ka rënë pre e dhunës fizike të dy të rinjve. Ngjarja ka ndodhur natën e djeshme brenda ambienteve të Repartit të Urgjencës në këtë spital.
Dy të rinjtë kanë qenë në korridorin e spitalit kur janë përplasur me infermierin Ernito Shehu dhe duke i kërkuar llogari se përse u kishte prerë rrugën, e kanë fyer me fjalë të rënda e më pas e kanë goditur me grushte e shkelma. Autorët janë larguar nga spitali në drejtim të paditur.
Pas hetimeve të kryera, policia ka arritur të identifikojë dy të rinjtë që goditën infermierin Ernito Shehu.
Autorët e ngjarjes me iniciale K.Sh., dhe E.D., janë shpallur në kërkim nga policia, ndërkohë që infermieri ka marrë lëndime të lehta. Burime policore konfirmojnë se ngjarja ka ndodhur për motive të dobëta dhe se infermieri nuk kishte njohje të mëparshme apo konflikt me këta shtetas.
