Një vrasje me thikë ka ndodhur këtë fshatin Breg-Lumë të Tropojës, ku viktimë ka mbetur një 24-vjeçar.
Ngjarja ndodhi një ditë më parë, në një lokal të fshatit buzë Fierzës, ku një 40-vjeçar goditi me thikë tre persona. Këtë të premte, policia konfirmoi se një prej të plagosurve ka humbur jetën.
Lidhur me ngjarjen janë arrestuar pesë persona të akuzuar se përkrahën autorin e vrasjes, ndërsa personi që qëlloi me thikë, nuk është arritur të vihet në pranga dhe është shpallur në kërkim.
Sipas bluve, ngjarja ndodhi “për motive të dobëta“.
“Më datë 11.07.2024, rreth orës 17:00, në një lokal në fshatin Breg-Lumë, për motive të dobëta, shtetasi S.S., 40 vjeç, plagosi me mjete prerëse, shtetasit V.P., 32 vjeç, Sh. K., 45 vjeç, si dhe vëllanë e shtetasit V. P., shtetasin A. P., 24 vjeç, i cili si pasojë e plagëve, humbi jetën në spital”, njoftoi policia.
Dy të dëmtuarit vijojnë të jenë në kujdesin e mjekëve, ndërsa vijojnë kërkimet intensive për kapjen e shtetasit S.S., shtuan të njëjtat burime.
Personat e arrestuar janë:
-A. Q., 39 vjeç, për veprat penale “Përkrahja e autorit të krimit” dhe “Moskallëzimi i krimit”;
-Xh. M., 31 vjeç, për veprat penale “Veprime që pengojnë zbulimin e së vërtetës” dhe “Moskallëzimi i krimit”;
-A. Sh., 34 vjeç, për veprën penale “Moskallëzimi i krimit”;
-A. B., 29 vjeç, për veprën penale “Moskallëzimi i krimit”;
-J. K., 34 vjeç, për veprën penale “Moskallëzimi i krimit”.
