Senatorët e Shteteve të Bashkuara të Amerikës Chris Murphy dhe Gery Peters vizituan këtë të mërkurë Tiranën. Në kuadër të një turi rajonal ata zhvilluan takime me presidentin, Bajram Begaj dhe me kryeministrin Edi Rama.
E pranishme në takime ishte dhe ambasadorja Yuri Kim.
Përmes një postimi në rrjetin social Twitter Kim shkruan se SHBA nuk ka mik më të mirë se Shqipëria, e se bashkëpunimi mes vendeve është më i rëndësishëm se kurrë.
“Është kënaqësi të kesh senatorë Chris Murphy dhe Gary Peters në Shqipëri për të përforcuar marrëdhëniet amerikane me demokracinë, mbrojtjen dhe biznesin. Siç tha dhe senatori Murphy, “SHBA nuk ka mik më të mkrë se Shqipëria”.
Si aleatë të NATO-s dhe anëtarë të Këshillit të Sigurimit të OKB-së, bashkëpunimi ynë, për çështjet rajonale dhe globale nga mbështetja e normalizimit të marrëdhënieve ndërmjet Serbisë dhe Kosovës, te refuzimi i luftës së Rusisë kundër Ukrainës, te largimi i miqve afganënga rreziku, te forcimi i mbrojtjes kundër sulmeve kibernetike, është më e rëndësishme se kurrë”, përfundoi Kim.
