Nëna e Daniel Qoses, një prej të arrestuarve për vrasjen e recepsionistit Eraldo Nevruzi, ka folur për mediat për ngjarjen e rëndë.
Mes lotësh, Kostaqe Qose tha se pronari i hotelit, Gerald Shehu, i ka kërcënuar me armë dy punëtorët e tij, Danielin dhe David Lartin për ta ndihmuar në fshehjen e trupit. Ajo tha se djali kishte shkuar në Dhërmi që prej muajit prill pasi punonte si kamarier në hotelin ku ndodhi ngjarja.
Ajo tha se djali i saj kishte 5 vite që punonte në hotel, por kurrë nuk kishte patur probleme. Lajmin e arrestimit të djalit, ajo e ka marrë vesh në televizor por thotë se ai nuk ka lidhje me vrasjen.
“Dëgjova nga TV në mëngjes që ishte bërë një vrasja, nuk e dija që kishte ndodhur në lokalin ku punonte djali, i rashë telefonit nuk më përgjigjej, e shikoja në linjë i bija por ma mbylli. Mora vajzën në Gjermani dhe e pyeta si e ka emrin lokali ku punon djali? Më duket se Greccia më tha. Marrim pyesim një shok në Dhërmi, edhe ai më tha i bije dhe nuk më përgjigjet por mos ki merak se do shkoj unë.
Gjetëm numrin më pas, i thamë interesohemi për një djalë që është ai staf. Na thanë i kemi arrestuar po i marrin në pyetje por nuk mund t’ju japim sqarim. Në orën 10 pashë në lajme figurën e djalit. Djali ka ikur që në 6 prill ka 5 vite që punon aty, tek i njëjti pronar dhe nuk ka patur probleme më herët.
Siç thonë edhe në lajme ai i ka kërcënuar dhe i kanë dhënë qese kuzhine dhe e kanë ndihmuar në makinë se i ka kërcënuar me armë. Është nisur burri me çupën andej se morën një avokat dhe nesër kanë gjyqin. Danieli nuk e njihte se aq ditë kishte në punë, por ky pronari njihej me të që në Angli, kanë bërë sherre. Nuk kemi mundësi për ta ndjekur, djali mori rrugët për të punuar”.
Nëna e Qoses ka treguar se me djalin ka folur për herë të fundit para tre ditësh dhe ai i kishte premtuar se do t’i sillte para sapo të niste sezoni zyrtarisht.
“Fola para tre ditëve, i thashë biri i nënës i thashë si je a po punon, më tha mami po presim anglezët, do të punoj do të të dërgoj ndonjë lek. Vetëm djali na punon edhe këtu në Korçë ka punuar banakier në lokale ndërsa atje ka punuar banakier e fuste pronari edhe te piceria. Djali nuk ka pasur më herët shqetësime nga pronari, këtë vit nuk donim ta dërgonim kaq herët se fejonim çupën por pronari i tha hajde se zihet vendi. Deri në shtator punonte aty”.
