Është gjetur pas 9 orësh kërkime trupi i pajetë i shoferit 21-vjeçar, Fabjol Ibraliu, i cili pësoi aksident mbrëmjen e djeshme në aksin rrugor Lushnje-Rrogozhinë. Trupi është gjetur disa metra larg makinës brenda bimësisë së dendur në oborrin e një banese në fshatin Konjat të Lushnjes. Siç shihet de nga pamjet e mëposhtme, kanë qenë banorët e zonës, ata që kanë zbuluar të shokuar trupin e të riut, mes shkurreve, disa metra larg vendit ku kishtë përfunduar makina.
Ibraliu po drejtonte një “Ford”, i cili ka kaluar barrierat anësore dhe është futur brenda oborrit të një banese. Referuar informacioneve paraprake, dyshohet se shpejtësia tej normave të lejuara ka qenë shkaku i aksidentit. Nga sa shihet, 21-vjeçari ka qenë duke udhëtuar me 160-km në orë në momentin fatal të aksidentit.
Që prej mbrëmjes së djeshme, forcat policore dhe familjarët kanë zhvilluar kërkime për trupin e 21-vjeçarit, zhdukja e së cilit ishte mister deri para pak minutash. Mësohet se drejtuesi i mjetit ka dërguar babin në punë dhe më pas është nisur drejt punës së tij. Ky aks rrugor, mbetet një njollë e zezë për aksidentet, ndërsa banorët e zonës, shprehen se nuk kalon më shumë se një javë pa ndodhur një përplasje. Errësira në zonë, bën shpesh që shoferët të humbasin kontrollin e mjeteve, dhe të përfshihen në aksidente me pasoja të rënda.
