Nëna e 27-vjeçares, Sibela Abedini, ka rrëfyer mes lotësh momentet e fundit të jetës së të bijës. Ajo ka treguar se 27-vjeçarja para se të dilte në tarracë nga ku dyshohet se është vetëhedhur, kishte vendosur në gjumë të bijën, 2 vjeç, dhe më pas kishte dalë të konsumonte një cigare. Në momentin që familjarët vunë re mungesën e Sibelës, ishte vëllai i saj ai i cili kishte vështruar në dritare dhe kishte parë të motrën poshtë në rrugë të gjakosur, duke menduar se ndonjë automjet e kishte përplasur. Menjëherë ata e dërguan në spital, aty ku dhe fatkeqësisht ndërroi jetë. E ëma ka treguar se në momentet e fundit të jetës, Sibela i ka lënë amanet të vëllait vajzën e saj dhe pasi i shtrëngoi dorën ndërroi jetë.
“Dhomën ku jetoj e kam përhohësisht, pronari i shtëpisë më tha pastroje dhomën se ka lagështirë që ta lyejmë e të kaloni tek shtëpia. Sibela më tha mami hyr lahu se je e lodhur dhe shtriu. E vuri vajzën në gjumë, i tha motrës po dal të pi një cigare. Kur vajza e pa që po vonohej doli në sallon, në atë kohë erdhi po vinte djali.
Sibela nuk kishte ngrënë bukë sepse kishte thënë do presim vëllanë. Djali nxori kokën nga dritarja dhe bërtiti mami e ka shtypur makina Sibelën. Erdhi çuni ku është Sibela, kur e nxjerr djali kokën te penxherja vetëm ka bërtit mami e ka shkelur makina Sibelën. Djali nuk e dinte dhe kapi për fyti shoferin e fugonit sepse mendoi se e shtypi ai. Vajza ishte ende gjallë. E dërguan në spital, i shtrëngoi dorën të vëllait dhe i tha amanet Ambrën dhe ka dhënë shpirt”, tha e ëma.
27-vjeçarja Sibela Abedini, nënë e një vogëlusheje vetëm 2 vjeç, u hodh nga kati i katërt i një pallati në zonën e Kamzës, pasi tik-tokeri i njohur Altin Çoku publikoi në rrjetet sociale një foto intime me të renë nga dhoma e hotelit ku dhe kishin qëndruar bashkë. Sibela jetonte me vajzën e saj në Kamzë, pasi kishte nisur procedurat e divorcit me bashkëshortin nga Kosova. Të afërm të 27-vjeçares deklaruan për mediat se ajo shkonte punonte si pastruese te banesa e Çokut, aty ku dhe u njoh me këtë të fundit. Ngjarja fillimisht u raportua si vetëvrasje, ndërsa dje, dy ditë më pas Policia e Tiranës ka arritur të zbardhë atë dhe ka prangosur shtetasin Altin Çoku. Ky i fundit akuzohet se ka publikuar një foto të 27 vjeçares në rrjetin social Tik Tok.
