Varka e emigrantëve në të cilën vdiqën pesë persona ishte kaotike, e mbingarkuar dhe e mbushur me njerëz që mbanin armë dhe luftonin, sipas një prej pasagjereve që ishte në bord.
Kjo tragjedi ndodhi në orët e para të mëngjesit të së martës në ujërat pranë qytetit bregdetar francez të Wimereux. Varka, e cila u nis me 112 persona në bord, u ndal vetëm disa qindra metra larg bregut.
Heivin, 18 vjeç, një prej emigranteve që shpëtoi tha se varka u sulmua nga një grup rival migrantësh, të armatosur me shkopinj dhe thika, ndërsa po përgatitej të nisej. Ajo tha:
“Njerëzit po luftonin, njerëzit po shkelnin njëri-tjetrin, ata po vdisnin dhe po hidheshin në det”.
Ajo tha se ra në ujë, por u tërhoq nga një person tjetër në varkë. Dy pasagjerë të tjerë që ranë në ujë, mes tyre edhe një vajzë e re, janë mbytur. Tre persona të tjerë vdiqën në varkë.
“Ata shkaktuan një tragjedi të madhe. Ishte për shkak të tyre që njerëzit vdiqën. Nëse ata nuk do të kishin ardhur dhe do të fillonin të luftonin, asgjë nga këto nuk do të kishte ndodhur.”
Ajo tha se grupi i saj, i përbërë nga 50 deri në 60 persona, kishte mbërritur në plazhin në Wimereux pasi kishte ndjekur udhëzimet e kontrabandistëve të njerëzve që kishin marrë paratë e tyre në këmbim të një kalimi për në Britani. Të fshehur, ata kishin pritur që kontrabandistët të përgatisnin gomonen.
Në momentin që kanë parë oficerët e policisë ata kanë vrapuar drejt ujit. Por në atë moment doli edhe grupi rival, i cili hipi në varkë së bashku me personat që kishin paguar kontrabandistët.
Heivin tha se ajo pa emigrantë nga ky grup që mbanin shkopinj dhe thika, duke u përplasur me policinë dhe pasagjerët.
