Ligj ambicioz që merr parasysh disa prej kërkesave të biznesit, por që ka nevojë për rishikimeve para se të çohet për votim në Parlament. Kështu e vlerësojnë grupet e interesit projektligjin e ri për energjitë e rinovueshme, i cili synon të rregullojë tregun e vetë-prodhimit nga fotovoltaikët.
“Ligji i ri ka marrë parasysh disa nga kërkesat tona si grup biznesi dhe ka sjellë edhe disa të reja. E para ka të bëjë me përfshirjen e konceptit të vetëprodhuesve kolektivë, si një nga kërkesat tona dhe të konsumatorëve. Nuk është marrë parasysh ndërkohë limiti për fuqinë e instaluar deri në 500 kv për të cilin ne kemi kërkuar që të ishte në nivel më të lartë”, thotë Anduel Çekrezi.
Gjithashtu nxitja e vetëprodhimit të energjisë përmes skemave përkrahëse nga qeveria, duhet të merret parasysh deri në miratimin e projektligjit.
“Do duhej të përfshihej një formë subvencioni për familjet që vendosin panelet fotovoltaike”, vijon Çekrezi.
Vetë-prodhues quhen të gjitha ato biznese që kanë të instaluar panele diellore për nevojat e veprimtarisë së tyre, kryesisht fabrika. Ligji i ri garanton mundësinë e tregtimit të tepricave të tyre, pra energjisë qe nuk shfrytëzohet, një kërkesë e hershme e sipërmarrjeve.
