Dy infermiere kanë përfunduar në pranga për vrasjen e ndodhur dje në një nga azilet e Tiranës. Në pranga kanë përfunduar infermieret Nazime Mulla dhe Glesantina Saraçi, të dyja banuese në Tiranë. Të dyja, në bashkëpunim me njëra-tjetrën, sipas Policisë kanë konsumuar veprën penale “Veprime që pengojnë zbulimin e së vërtetës”. Pasi ndodhi vrasja, të dyja nuk e kanë njoftuar Policinë, e po ashtu, tentuan që të pengojnë zbardhjen e ngjarjes duke fshirë dhe pastruar dhomën.
NJOFTIMI I POLICISË:
Tiranë
Në lidhje me ngjarjen e ndodhur ditën e djeshme, më datë 08.08.2024, ndodhur në një azil privat për të moshuarit, ku shtetasi Z. Sh., 78 vjeç, ka goditur me bastun shtetasin V. V., i cili si pasojë e dëmtimeve të marra ka humbur jetën, ju informojmë se: Në vijim të veprimeve hetimore të thelluara të kryera u arrestuan shtetaset G. S., 26 vjeçe, dhe N. M., 31 vjeçe, të dyja banuese në Tiranë, me profesion infermiere në azilin ku akomodoheshin dy të moshuarit.
Nga hetimi i kryer u siguruan prova të mjaftueshme që krijojnë dyshimin e arsyeshëm se dy të arrestuarat në bashkëpunim me njëra-tjetrën, kanë konsumuar veprën penale “Veprime që pengojnë zbulimin e së vërtetës”, parashikuar nga neni 301/25 i Kodit Penal. Këto dy shtetase nuk kanë njoftuar organet kompetente për ngjarjen e ndodhur si dhe kanë kryer veprime që pengojnë zbulimin e së vërtetës. Materialet i kaluan Prokurorisë.
Mëngjesin e djeshëm, ishte 78-vjeçari Zyhdi Shehi që goditi me bastun Virxhil Veshon, ky i fundi si pasojë e dëmtimeve të marra ndërroi jetë. Sherri mes tyre nisi për një debat banal lidhur me krevatin dhe përfundoi me një jetë të humbur. I moshuari tjetër tashmë është në pranga dhe pret vendimin e drejtësisë
