Një aksident i rëndë ka ndodhur në orët e para të mëngjesit të sotëm në afërsi të poliklinikës qëndrore në qytetin e Vlorës. Dy mjete janë përplasur mes tyre, ndërsa njëri është përfshirë më pas nga flakët. Burime bëjnë me dije se njëri prej mjeteve, drejtohej nga një punonjës policie, i cili ka qenë jashtë shërbimit, ndërsa është konstatuar në gjendje të dehur.
Ai ka arritur që të dalë në kohë nga mjeti, që ka shpërthyer në flakë, pa marrë lëndime. Ndërkohë që mjeti tjetër drejtohej nga një vajzë e re, e cila mbeti e plagosur lehtë, jashtë rrezikut për jetën. Për ngjarjen kanë nisur hetimet dhe nga Agjensia e Mbikqyrjes Policore, për shkak se efektivi, edhe pse jashtë shërbimit ka qenë në gjendje të dehur.
“Në orët e para të mëngjesit, në bulevardin “Ismail Qemali”, në afërsi të poliklinikës, automjeti tip “Benz” me drejtues shtetasin A. C. (punonjës policie, jashtë shërbimit) është përplasur me automjetin tip “Audi” me drejtuese shtetasen A. A., e cila u dërgua në spital dhe është jashtë rrezikut për jetën.
Nga veprimet e para në vendngjarje, ka rezultuar se shtetasi A. C. ka qenë në efektin e alkoolit.Grupi hetimor dhe opgj të AMP-së, në drejtimin e Prokurorisë, vijojnë punën për sqarimin e rrethanave të aksidentit.”-njofton policia.
