Një ngjarje e rëndë është regjistruar këtë të premte në Vlorë, ku një 29-vjeçare është dhunuar nga babai, vëllai dhe i fejuari i saj. Ngjarja ka ndodhur në banesën ku e reja jeton me prindërit, ndërsa shkak për degradimin e sherrit raportohet se është bërë refuzimi i vajzës për të bashkëjetuar me 34-vjeçarin, Armandi Jaka.
Me këtë të fundit ajo ishte fejuar pa dëshirën e saj dhe vetëm me miratimin e prindërve. Në momentin që ajo ka thënë, jo, fillimisht e ka dhunuar i fejuari, pastaj babai i saj, Astrit Barjami dhe vëllai Erlind. E reja ndodhet e shtruar në spital, nën kujdesin e bluzave të bardha, fatmirësisht jashtë rrezikut për jetën.
Vlorë/Parandalohet përshkallëzimi i dhunës në një familje. Ushtruan dhunë fizike ndaj 29-vjeçares, për motive të dobëta, vihen në pranga babai, vëllai dhe i fejuari i saj. Sekuestrohen 1 armë gjahu dhe një sasi municioni luftarak, që i posedonte babai, në banesë. Shërbimet e Komisariatit të Policisë Vlorë, pas marrjes së njoftimit se një 29-vjeçare ishte dhunuar nga familjarët e saj, për motive të dobëta, në banesë, kanë ndërhyrë menjëherë për parandalimin e përshkallëzimit të dhunës.
Si rezultat, shërbimet e Policisë kanë kapur dhe arrestuar shtetasit: A. B., 60 vjeç (babai), E. B., 26 vjeç (vëllai) dhe A. J., 34 vjeç (i fejuari). Nga veprimet hetimore dyshohet se për motive të dobëta, këta shtetas kanë ushtruar dhunë fizike ndaj 29-vjeçares, e cila është në kujdesin e mjekëve, jashtë rrezikut për jetën. Gjatë kontrollit në banesën e shtetasit A. B., Policia gjeti dhe sekuestroi 1 armë gjahu dhe municion luftarak. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme
