Deputeti i PS-së dhe opozitari brenda partisë, Erion Braçe ka ngritur alarmin për dëmin ekologjik që po shkaktohet në Divjakë, si pasojë e ndryshimit të shtratit të lumit Shkumbin.
Sipas Braçes, ndryshimi i grykëderdhjes së Shkumbinit, si e vetmja lidhje e Lagunës së Karavastasë me detin do të sjell edhe të gjithë shkatërrimin kolosal biodiversitetit të saj.
Ai u është drejtuar me një thirrje institucioneve përgjegjëse që të reagojnë në kohë dhe të marrin masa përpara se të jetë shumë vonë.
“Drama ekologjike e Divjakës, nuk po lëviz kënd nga zyra e rehatit! Deti po shkon në Bari, Laguna do thahet! Idiotët që i ndryshuan shtratin dhe grykëderdhjen në det lumit Shkumbin, sollën këtë dëm kolosal! Ata heshtin! Por këta që kanë përgjegjësinë sot për të ndërhyrë, pse rrinë e fërkohen?!
Nuk ka më kohë nëse nuk duan që dëmi të bëhet i pakthyeshëm! Koha u humb katër vite me radhë kur Bashkia Divjakë dhe unë- tani kryetari Josif Gorrea, paralajmëruam që do të ndodhë kjo që shihni.
Të gjithë bënin e bëjnë sikur dëgjojnë, të gjithë bëjnë asgjë, kanalet e komunikimit të Lagunës me detin u taposën njëri pas tjetrit, ndërkohë që tani, komunikimi i lagunës me detin thuajse është ndërprerë! Tani duhet vepruar në kushte emergjence ekologjike?
1. Të kthehet lumi Shkumbinnë shtratin e vjetër sa më parë, ndryshimi i tij ka sjellë keto pasoja
2. Të ndërhyhet, të mbahet hapur gryka e vetme e Lagunës e të rivendoset komunikimi i Lagunës me detin!
Nuk ka kohë për banjo dielli! Koha ka mbaruar, tani jemi në kohën e vdekjes së Lagunës dhe parkut bashkë me të!”- shkruan Erion Braçe.
