Autori i vrasjes së policit Nevruz Cenalia në Fier vijon të jetë në arrati.
Asllan alias Azgan Mernica ka qenë me nënën e tij në makinë kur ka ekzekutuar me një plumb në kokë efektivin e forcave Shqiponja.
23-vjeçari dhe efektivi i policisë, i cili ishte nisur për në punë janë konfliktuar në rrugë për parakalimin e makinave pasi rruga ishte e ngushtë. Autori pasi ka qëlluar me një plumb në kokë policin, është larguar bashkë me nënën e tij për rreth 4 km nga vendngjarja dhe më pas ka braktisur makinën te daja e tij.
Kontrollet e forcave të policisë janë shtrirë në disa fshatra të Fierit ndërsa postoblloqe ka patur edhe në Vlorë. Deri më tani janë shoqëruar në polici 12 persona për ngjarjen, familjarë të autorit të cilët janë marrë në pyetje nëse kanë dijeni për vendndodhjen e 23-vjeçarit.
Policia ka vënë në dispozicion 30 mijë euro për çdo informacion të vlefshëm që do të çojë në kapjen e autorit.
