Detaje të reja janë zbardhur nga ngjarja e rëndë që u raportua pak ditë më parë në Golem. Një 15-vjeçare akuzoi babain se e ka përdhunuar prej 4 vitesh, por në seancën gjyqësore e mitura tha se gjithçka ishte gënjeshtër.
Shkak për këtë gënjeshtër të saj ishte bërë një debat që kishte patur me babain për celularin dhe përdorimin pa limit të tij. Babai ka parë komunikimet e shpeshta të vajzës në celular, nuk mësonte në shkollë, nota shumë të ulëta dhe ka filluar t’i kërkojë llogari.
Por për shkak të një ndërhyrjeje kirurgjikale që vajza kishte bërë kur ishte rreth klasës së tretë ose të katërt, ajo ishte më e përkëdhelura e shtëpisë. Në një moment, babai ia ka marrë celularin dhe ka parë disa biseda jo të hijshme për moshën e saj me një shoqe dhe i ka kërkuar llogari.
Por ka hasur në rezistencën e së bijës dhe një debat familjar. Babai i ka vënë një kusht që në rast se situata dhe historia përsëritet, unë do të ta marr celularin. Sërish pas disa ditësh është përsëritur po i njëjti diskutim, po i njëjti debat dhe i ati ia ka marrë celularin dhe i ka thënë se nuk do e linte që të dilte nga shtëpia sepse do të duhej të përkushtohej dhe të mësonte në shkollë.
Por këto kushte të babait e kanë revoltuar 15-vjeçaren e cila në një bashkëbisedim me mamanë i ka thënë: “Mos ma përmend babain sepse më vjen për të vjellë” dhe nëna e ka pyetur se “pse, çfarë ka ndodhur, çfarë të tha?”.
Ajo i ka treguar nënës fillimisht që babai më ka abuzuar seksualisht para 4 vitesh ndërkohë që herën e fundit ka ndodhur 2 ditë përpara sherrit. Nëna ka shkuar menjëherë t’i kërkojë llogari bashkëshortit në lidhje me këtë historinë, ai ia ka mohuar kategorikisht, “nuk është e vërtetë, nuk ka ndodhur një gjë e tillë”. Këtë version babai ka mbajtur edhe në seancën gjyqësore ku vajza mes lotësh ka treguar si qëndron e vërteta.
