Mirosllav Lajçak i dërguari i posaçëm i BE-së për dialogun mes Kosovës dhe Serbisë, është duke bërë përpjekje të organizojë një takim mes kryeministrit të Kosovës, Albin Kurti, dhe presidentit të Serbisë, Aleksandar Vuçiç, në Bratislav.
Sipas mediave botërore kjo është ende një përpjekje dhe nuk ka konfirmime nga palët nëse janë apo jo të gatshme për një takim të tillë.
Bratislava është përmendur si vend i mundshëm për takim, pasi dy udhëheqësit janë të ftuar të marrin pjesë në një konferencë për sigurinë globale që po zhvillohet në këtë vend.
Situata e protestave në veri të Kosovës aktualisht paraqitet e qetë. Përfaqësuesit e Listës Serbe dhe protestuesit në Leposaviç i janë drejtuar oborrit të Kishës, pas bisedimeve me KFOR-in amerikan.
Qytetarët serbë kanë dalë sot sërish në protestë në veri të Kosovës për të ndaluar hyrjen e kryetarëve të rinj shqiptarë në selitë e komunave në veri Zubin Potok, Zveçan dhe Leposaviç. Protesta ka nisur pa incidente, ndërsa KFOR dhe Policia e Kosovës kanë ngritur barrikada sigurie rreth ndërtesave shtetërore për të shmangur përshkallëzimin e situatës. Ndërkohë, kryekomunarët kanë njoftuar se për shkak të situatës, ata sot nuk do të paraqiten në zyrat e punës.
