Futbollisti Sergio Ramos dëshiron që të qëndrojë te PSG dhe klubi parisien synon që të rinovojë me të në fund të sezonit. Por akordi i ri varet nga e ardhmja e Lionel Mesit te PSG.
Nëse ylli argjentinas vendos që të rinovojë me parisienët, atëherë për mbrojtësin spanjoll do të jetë e vështirë që të qëndrojë në “Park de Prins”, për shkak të rregullave të fair play financiar, raporton “Marca”.
36-vjeçari iu bashkua PSG-së nga Real Madrid si lojtar i lirë, por në sezonin e tij të parë luajti pak për shkak të dëmtimeve. Por, Ramos është kthyer në një lider të ekipit dhe kjo gjë vlerësohet nga drejtuesit e klubit, të cilët preferojnë ta mbajnë atë.
Messi dhe Ramos janë ndër yjet më të paguar të PSG-së dhe të dyve u skadon kontrata këtë verë. Ramos është futbollisti me më shumë paraqitje të kombëtarja spanjolle, 180 përgjatë 18 viteve.
Ai ishte pjesë e “Furisë së kuqe” kur fitoi Kupën e Botës në vitin 2010, ndërsa triumfoi edhe gjatë Euro 2008 dhe Euro 2012. Ai vendosi largimin nga kombëtarja, pas përfundimit të botërorit Katar 2022, ku nuk mori pjesë.
