Më shumë se 24 mijë njerëz janë vrarë në Gaza që kur Izraeli filloi reagimin e tij ndaj sulmeve të Hamasit të 7 tetorit, sipas ministrisë së shëndetësisë palestineze. Shumica e 2.3 milionë banorëve të Gazës janë të zhvendosur dhe “luftojnë” çdo ditë për të gjetur ushqim, pije dhe ilaçe.
“Kam humbur shtëpinë time, dyqanin dhe burimin tim të të ardhurave. Nuk jam më në gjendje të siguroj kërkesat më të thjeshta të jetës për fëmijët e mi. Unë e konsideroj pushtimin izraelit përgjegjës për shkatërrimin masiv, por nuk e shfajësoj Hamasin nga përgjegjësia për gjithçka që ndodhi. Gjëja më e keqe që mund të ndodhë është që ne të kthehemi në situatën e mëparshme, në një luftë çdo dy ose tre vjet. Situata ishte e vështirë para luftës dhe tani është bërë katastrofike. Çmimet e mallrave janë rritur dhjetëfish dhe shumica e mallrave elementare nuk janë të disponueshme. Preferoj vdekjen sa herë që shoh në sytë e fëmijëve të mi dhe ndjehem aq i pafuqishëm, pasi nuk jam në gjendje t’i ushqej. Nuk gjej qumësht për fëmijën tim, djali im është me autizëm dhe nuk mjekohet prej muajsh. Nuk mund ta qetësoj dhe gjendja e tij është përkeqësuar pasi kemi bërë përparime të mëdha në trajtimin e tij para luftës”, tha Mohammed al-Khaldi, baba i dy fëmijëve të zhvendosur nga qyteti i Gazës, për BBC.
Ndërkohë, Neveen Imadedin, një nënë e zhvendosur nga shtëpia e saj në qytetin e Gazës dhe tani jeton në qytetin jugor të Rafah tha për BBC se shtëpia e saj u bastis nga grabitësit.
