Receta e ditës, tavë dheu

Tava e dheut me mish është një gatim tradicional i kryeqytetit. Shumë i shijshëm dhe i lehtë për t’u gatuar.

Përbërësit

• 30 gr qepë
• 30 gr spec i kuq (djegës)
• 30 gr spec jeshil
• 70 gr mish viçi
• 30 gr gjizë
• 50 gr salcë domatesh
• 10 gr miell
• 3 gr majdanoz
• 2 gr kripë
• 2 gr piper
• pak gjalpë
• gjysmë thelpi hudhër
• vaj ulliri.

Udhëzimet

1. Për përgatitjen e tavës së dheut, si fillim presim mishin në kubikë të vegjël. Më pas grijmë në rende qepën dhe specin jeshil.
2. Në një tenxhere hedhim pak vaj ulliri dhe hedhim qepën, mishin dhe specin. I shtojmë edhe miellin dhe i kaurdisim deri në momentin që të marrë një ngjyrë të kuqërremtë.
3. Më pas i shtojmë salcën e domates, specin e kuq djegës, që më parë e kemi grirë në rende dhe pasi i kaurdisim përbërësit, shtojmë pak ujë dhe gjizë dhe i lemë të ziejnë për 2-3 min. Pas zierjes e heqim tenxheren dhe e lemë mënjanë.
4. Marrim tavën e dheut, e lyejmë me gjalpë dhe e vendosim në sobë, në mënyrë që të nxehet sa më shumë.
5. Në momentin që tava është zier, i hedhim përzierjen e përgatitur dhe e fusim në furrë për 5 minuta në temperaturën 200 gradë.
6. Pasi nxjerrim tavën nga furra, ajo është gati për t’u shërbyer.
7. Ju bëftë mir!