Kreu i Selië së Shenjtë Papa Françesku është shtruar me urgjencë në një spital në Romë, ku sipas Vatikanit do t’[i nënshtrohet një ndërhyrje kirugjikale në zonën abdominale.
Kujtojmë se kjo është hera e tretë brenda vitit që kreu kishës katolike shfaq probleme shëndetësore për të cilat është detyruar të qëndrojë në spital.
Në një njoftim zyra e Shtypit të Vatikanit thotë se shtrimi i tij në spital ishte i nevojshëm pasi herë pas here kishte dhimbje të cilat përkeqësoheshin.
“Papa, nën anestezi të përgjithshme, do t’i nënshtrohet laparotomisë dhe operacionit plastik të murit të barkut me proteza. Operacioni, i organizuar ditët e fundit nga ekipi mjekësor në ndihmë të Atit të Shenjtë, u bë i domosdoshëm për shkak të një hernie incizionale që po shkakton sindroma të përsëritura, të dhimbshme dhe përkeqësuese të sindromave subokluzive. Shtrimi në institucionin shëndetësor do të zgjasë disa ditë për të mundësuar ecurinë normale postoperative dhe shërim të plotë funksional”, njofton drejtori i zyrës së shtypit të Vatikanit, Matteo Bruni.
Për të njëjtin problem, Papa u operua edhe dy vite më parë dhe u kthye në Vatikan pas një shtrimi 10 ditor në spital.
Pas ndërhyrjes, Papa Françesku duhet të qëndrojë disa ditë i shtruar në spital.
Kjo është hera e tretë që Ati i Shenjtë shtrohet në spital, duke kujtuar edhe atë në mars të këtij viti pas problemeve me frymëmarrjen.
