Një masakër ka përgjakur Serbinë mëgjesin e sotëm. Tetë nxënës dhe roja i një shkolle fillore janë vrarë nga një 14-vjeçar.
Nxënësi i klasës së shtatë në shkollën “Vladislav Ribnikar” në Beograd mëngjesin e sotëm ka hapur zjarr ndaj rojes, mësuesve dhe nxënësve.
Nga të shtënat me armë mbetën të vdekur 8 nxënës edhe roja, Dragan Vlahoviç.
Raportohet se janë plagosur 6 fëmijë dhe mësuesja e historisë. Mediat serbe raportojnë se disa prej të lënduarve janë në rrezik për jetën.
Roja i shkollës Dragan Vlahoviç
“Në oborrin e shkollës është gjetur dhe arrestuar nxënësi i kësaj shkolle me iniciale K. K., i cili dyshohet se ka kryer këtë vepër penale. Të gjitha forcat e policisë janë ende në terren dhe po punojnë intensivisht për zbardhjen e të gjitha fakteve dhe rrethanat që çuan në këtë tragjedi”, thuhet në njoftimin e MPB.
Autori i dyshuar i masakrës në shkollën fillore është vendosur në prangat e policisë.
Ai u gjet dhe arrestua në oborrin e shkollës.
Një nga prindërit, i cili ndodhej përballë shkollës ku ndodhi tragjedia, rrëfeu: “Unë vrapova këtu dhe nuk e di se çfarë po ndodh. Babai i njërës prej vajzave vrapoi në shkollë dhe pa rojen e vdekur dhe dy vajza të shtrira mbi njëra-tjetrën. E tmerrshme, nuk mund ta besoj.”
