Moti i keq ka pushtuar italinë e veriut. Shirat e dendur dhe përmbytjet çuan në evakuimin e rreth 900 banorëve në rajonet Emilia-Romagna dhe Marche të Italisë pasi lumenjtë dhe përrenjtë dolën nga shtrati.
Deri më tani nuk raportohen viktima as të plagosur.
Shërbimet zjarrfikëse raportuan rrëzimin e pemëve, rrëshqitjet e dheut dhe bllokimin e makinave. Ata u thirrën më shumë se 120 herë.
Të gjitha bashkitë përgjatë Adriatikut bllokuan hyrjen në plazhe, për shkak të erërave të forta dhe dallgëve të larta.
Po ashtu në provincën Pesaro Urbino në Marche pati rrëshqitje dheu.
Banorëve iu kërkua të shmangin udhëtimet e panevojshme dhe të punojnë nga shtëpia aty ku është e mundur.
Edhe në Siçilia pati shira të dendur në orët e para të mëngjesit.
Shërbimet e urgjencës u thirrën 115 herë për të ndihmuar shoferët ose për të pastruar pemët e rënë në rrugë.
