Klementin Islamaj është 41-vjeçari i arrestuar për vrasjen e babait të tij, Hysen Islamaj ditën e djeshme në Konispol. 41-vjeçari ka deklaruar para hetuesve se nuk ka patur qëllim ta vriste babain, por thjesht e ka shtyrë pasi ai i kishte vrarë nënën 66-vjeçare Shano Islamaj.
Ai ka treguar se kur ka ndodhur ngjarja e rëndë ka qenë në lokalin e fshatit duke pirë kafenë e mëngjesit me shokët.
Por pasi ka dëgjuar zhurma nga shtëpia e tij ka ikur me vrap dhe ka parë nënën e vrarë në mes të shtëpisë. Mes lotësh ai ka thënë se babain e ka shtyrë për ta larguar, por ai është penguar dhe ka humbur jetën.
“Vetë jam prind i dy fëmijëve dhe jam i divorcuar. Babai edhe një ditë më parë e ka dhunuar nënën. Ngjarja ka ndodhur rreth orës 06:00 të mëngjesit. Isha tek lokali i fshatit po pija kafe me disa shokë. Nga shtëpia u dëgjua zhurmë dhe më thanë bashkëfshatarët të çohesha të shihja çfarë kishte ndodhur. Kur shkova gjeta nënën të vrarë në mes të shtëpisë. Babain e shtyva që ta largoja nga vetja, por ai u pengua dhe ra. Nuk kisha qëllim ta vrisja”.
