Ish-futbollisti dhe ish-trajneri i Kombëtares, Bejkush Birçes, është ndarë nga jeta në moshën 81-vjeçare.
Legjenda e futbollit shqiptar është shuar për shkak të problemeve shëndetësore.
Homazhet për Bejkush Birçen do të zhvillohen ditën e hënë në ambientet e stadiumit “Air Albania”, duke nisur nga ora 11:00.
Birçes është një nga emrat më të mëdhenj të futbollit shqiptar. Ai dha kontribut si lojtar, si trajner dhe si zëvendëspresident i FSHF-së.
Ai ka qenë një nga futbollistët e Partizanit, të cilin më pas e drejtoi edhe si trajner.
Gjithashtu, ai ka qenë edhe trajner i Naftëtarit, Flamurtarit dhe Lokomotivës së Durrësit.
Bejkush Birçes drejtoi Kombëtaren në vitet ’90, kohë kjo e vështirë për vendin, pasi futbollistët përfitonin nga largimi jashtë Shqipërisë për ndeshje, për të braktisur ekipin dhe vendin e tyre.
Karrierën si trajner, ai e mbylli në Durrës, në mesin e viteve ’90, kur iu desh që të drejtonte Teutën për herë të dytë.
