Komisioni dhe Këshilli Evropian kanë marr masa të reja duke vendosur të mos lejojnë stafin të përdorë rrjetin social kinez TikTok për shkak të shqetësimeve mbi sigurinë e përdoruesve. Një lëvizje e tillë vjen pas akuzave të ngritura nga qeveritë perëndimore se kompania po bashkëpunon me qeverinë kineze në mbledhjen e një sasie shumë të madhe të të dhënave të përdoruesve, duke u fokusuar veçanërisht tek përdoruesit që janë pjesë e politikës.
Lajmërimi nga Këshilli dhe Komisioni Evropian u bë gjatë ditës së enjte, ku iu kërkua të gjithë personave në staf të çinstalojnë TikTok nga pajisjet e tyre të punës dhe personale në qoftë se kanë të instaluar aplikacione që lidhen me punën e tyre.
Një zyrtar i lartë tregoi për Politico se që të gjithë personat që punojnë në këto pozicione, rreth 32,000, janë lajmëruar për çinstalimin e TikTok nga pajisjet e tyre. Në qoftë se stafi dëshiron të vazhdojë të përdorë TikTok në pajisjen personale do të duhet që të çinstalojnë aplikacionet që kanë lidhje me punën nga smartphone-i.
“Për të mbrojtur të dhënat e KE dhe për të rritur sigurinë kibernetike, Bordi i Menaxhimit të KE ka vendosur të ndalojë përdorimin e aplikacionit TikTok në pajisjet e korporatës si dhe pajisjet personale të regjistruara në shërbimet për smartphone të KE.” shkruhet në email-in e dërguar drejt stafit në mëngjesin e së enjtes.
Afati i fundit për çinstalimin e këtij aplikacioni është data 15 mars. Kjo është hera e parë që KE ka ndaluar përdorimin e një aplikacioni për stafin e tij.
