Një përplasje ‘titanësh’ dukej se po ndodhte mbrëmjen e kaluar ku Barcelona ka triumfuar në shtëpi ndaj Real Madrid-it, duke e mposhtur me rezultat 2:1 në ndeshjen e javës së 26-të në La Liga.
Madrilenët e nisën ndeshjen duke kaluar në epërsi që në minutën e nëntë.
Një depërtim nga krahu i Vinicius Junior dhe një harkim i tij, bëri që topi të devijohej në rrjetën e Barcelonës nga koka e mbrojtësit të tyre, Roland Araujo-s.
Pas golit të Araujo-s, lojtarët e Barçelonës e shtuan presionin dhe goli i barazimit erdhi në minutën e fundit të pjesës së pare.
Në pjesën e dytë loja mori akoma më shumë vrull, por drama ndodhi në fund.
Ishte minuta e 83-të, ajo e cila do të bënte që Real-i të shënonte golin e epërsië me anë të Marco Asensio-s, por ishte sistemi VAR që e anuloi atë për një pozicion milimetrik jashtë loje.
Në minutën e dytë shtesë, Barcelona ia doli ta shënojë golin e fitores, kur Franck Kessie realizoi pas një kundërsulmi, i asistuar nga Alejandro Balde.
Me këtë fitore, çështja e titullit kampion në La Liga duket praktikisht e mbyllur, duke qenë se Barcelona tani kryeson në plus 12 pikë nga Reali.
