Shtetet e Bashkuara dhe Koreja e Jugut kanë arritur marrëveshjen, që synon t’i kundërvihet kërcënimeve bërthamore të Koresë së Veriut.
Uashingtoni gjithashtu është pajtuar në mënyrë periodike që të furnizojë Korenë e Jugut me nëndetëse të pajisura nga armë bërthamore, si dhe të përfshijë Seulin në operacionet planifikuese bërthamore të SHBA-së.
E në këmbim, Koreja e Jugut është pajtuar që të mos prodhojë vetë armë bërthamore.
Deklarata e Uashingtonit do të forcojë bashkëpunimin e aleatëve në parandalimin e një sulmi nga Koreja e Veriut, tha presidenti vetë amerikan, Joe Biden.
Shqetësimet janë rritur në të dyja shtetet lidhur me kërcënimin bërthamor që paraqet Koreja e Veriut. Phenjani ka zhvilluar armë taktike bërthamore që mund të shënjestrojnë Korenë e Jugut, dhe ka përmirësuar armët e saj me rreze të gjatë veprimi, që mund të arrijnë tokën amerikane.
SHBA-ja veçse ka një traktat që kërkon të mbrojë Korenë e Jugut dhe më herët është zotuar se do të përdorë armë bërthamore nëse është e nevojshme. Në Korenë e Jugut nisën të dyshonin te ky përkushtim dhe bënë thirrje që shteti të zhvillonte një program bërthamor të tij.
“Një sulm bërthamor nga Koreja e Veriut kundër SHBA-së apo aleatëve dhe partnerëve të saj është i papranueshëm dhe do të rezultonte në fundin e çfarëdo regjimi që do të merrte një hap të tillë”, tha Biden.
SHBA-ja ka thënë se shpreson që të bindë Korenë e Veriut që të heqë dorë nga armët bërthamore, por vitin e kaluar lideri verikorean, Kim Jong Un, tha se statusi bërthamor i shtetit të tij është “i pakthyeshëm”.
