Vetëm fansat e futbollit e kuptojnë se ç’do të thotë të takosh nga afër dhe bësh foto me idhullin tend. Një 10-vjeçar nga Kosova, Floriani, është një tifoz i madh i Granit Xhakës. E nëntorin e kaluar, kur pati mundësinë të takonte nga afër idhullin e tij në ndeshjen e Zvicrës kundër Kosovës, ai u ngjit mbi pengesë pas ndeshjes dhe vrapoi drejt tij për një foto.
10-vjeçari pastaj u largua nga forcat e sigurisë. Mirëpo, kjo foto i ka kushtuar jo pak familjes së vogëlushit.
Babi i tij, Dritoni bëri të ditur se të premten ka marrë përmes postës një gjobë nga Federata e Futbollit e Zvicrës (SFV), prej 2597.15 frangash.
“Unë u trondita. Nuk ka pasur asnjë kërcënim, askush nuk është shqetësuar. Një djalë dhjetëvjeçar nuk është rrezik. SFV ka para të mjaftueshme. Nuk mendoj se 2500 franga është e drejtë apo sportive. Po, Floriani është i shpejtë, por definitivisht jo më i shpejtë se stjuardët. Duhet të ishin më të kujdesshëm.
2500 franga për një selfie me Xhakën është padyshim shumë e shtrenjtë për mua. Pavarësisht nëse është Xhaka apo Ronaldo, asnjë fëmijë nuk i meriton këto gjoba. Çështja duhet të jetë një mësim për të gjithë prindërit. Kini kujdes fëmijët tuaj! 200 franga do të ishin të përshtatshme. Ky do të ishte një kompromis i mirë”, deklaroi Dritoni.
Në anën tjetër, nga Federata Zvicerane u tha se kjo gjobë kaloi përmes tyre nga UEFA.
